Nah ada koné tuturan satua “I Cicing Gudig”. I Cicing Gudig, buka adanné berag tégrég tur keskes gudig, sing jalana mlispis ada dogén anak ngésékang wiadin ngaltig. Sai-sai koné ia maselselan, nyelselang buat kalacuranné tumbuh dadi cicing makejang anaké tuara ngiyengin.
Sedek dina anu I Cicing Gudig mlispis di pekené. Ada koné anak madaar di dagang nasiné, énto koné nengnenga menék tuunanga dogén. Kéné kenehné I Cicing Gudig, “Yan i déwék dadi manusa buka anaké énto, kénkén ya legan nyeté ngamah, mabé soroh ané melah-melah. Ah kené baan, nyanan petengé lakar mabakti ka Pura Dalem, mapinunas tekén Batari Durga apang dadi manusa.”
Kacrita suba peteng, mabakti koné lantas I Cicing Gudig di Pura Dalem. Medal lantas Ida Betari Durga tur ngandika tekén I Cicing Gudig, “Ih iba Cicing Gudig, dadi iba ngacep nira, apa katunasang?” Masaut I Cicing Gudig, “Inggih paduka Betari, yan paduka Betari ledang, titiang mapinunas mangda dados manusa.”
Kalugra koné pinunasné I Cicing Gudig, lantas ia dadi jlema. Déning I Cicing Gudig tusing bisa ngalih gaé, tusing pati kone ngamah. Mara-maraan ngamah ulihan maan mamaling. Pepes koné ia katara mamaling. Lantas buin koné ia mabakti di Pura Dalem.
Medal lantas Ida Betari Durga tur ngandika tekén I Cicing Gudig, “Ih iba cai I Cicing Gudig, ngénkén dadi iba buin mai?” Matur I Cicing Gudig, “Inggih paduka Betari, titiang tan wénten demen dados manusa panjak. Yan paduka Betari lédang, titiang mapinunas mangda dados “Patih”. Ida Betari Durga lugra.
Nujuang pesan koné dugasé énto Ida Sang Prabu ngrereh buin adiri. I Cicing Gudig lantas kandikaang dadi Patih, tur I Cicing Gudig ngiring. “Béh kewéh pesan i déwék dadi Pepatih, tusing ja maan ngénkén-ngénkén, begbeg pesan kandikayang tangkil ka puri. Yan i déwék dadi Anak Agung, kénkén ya legan nyeté nundén-nundén dogén.” Kéto kenehné I Cicing Gudig.
Glis satua énggal, nyanan petengné buin koné ia mabakti di Pura Dalem, mapinunasang apang dadi Anak Agung. Ida Betari Durga lugra, lantas patuh pesan koné goban I Cicing Gudigé tekén warna Ida Sang Prabu.
Kacrita Sang Prabu lunga koné ida jagi maboros ka alasé, macelig koné I Cicing Gudig ka puri. Déning patuh goban I Cicing Gudigé tekén Ida Sang Prabu, dadi kasengguh Ida Sang Prabu koné ia baan I Patih muah tekén prayogiané ané lén-lénan.
Matur I Patih saha bakti, “Titiang mamitang lugra Ratu Sang Prabu, punapi awinan dados Cokor I Ratu paragayan tulak saking paburuan?” Masaut I Cicing Gudig, “Kéné Patih, mawinan nira tulak, saking nira ngiringang sabdan Betara, tan kalugra nira malaksana mamati-mati. Kandikayang lantas nira tulak. To juru borosé ada pinunasa tekén nira, tusing ngiring mantuk, krana kadunga suba makenaan. Nira nglugrahin, mawanan tan pairingan nira mulih.” Kéto pamunyinné I Cicing Gudig, teka jag ngugu koné I Patih muah panjaké ané lén-lénan.
Kacritayang jani sai-sai koné I Cicing Gudig ngraosin anak mawikara. Réh Cicing gudig tuara nawang lud, makejang wikaran anaké pelih baana ngundukang, ané patut menang kalahanga, anak patut kalah menanganga.
To makrana kaupet koné I Cicing Gudig dadi Agung, sawai- wai ngencanin anak mawikara dogén. Yan I Déwék okan Anak Agung, kénkén ya demené, kema mai malali iringang parekan, di kénkénne magandong, buina tusing pesan ngitungan apan-apan, sajawaning ngamah tekén malali dogén.
Nyanan petengné, mabakti koné buin I Cicing Gudig di Pura Dalem, mapinunas apang dadi okan Anak Agung. Ida Betari Durga lugra. Patuh gobanné I Cicing Gudig buka warnanida Raden Mantri.
Buin mani semenganné, maorta ilang koné lantas Ida Raden Mantri. Ya sedeng ewana jeroné ngibukang Raden Mantri, deleng- deleng koné lantas I Cicing Gudig ngapuriang. Réh Cicing Gudig kasengguh Raden Mantri, makesiar keneh wang jeroné makejang.
Kacrita jani I Cicing Gudig kapurukang malajah masastra. Dening asing ajahina muah takonina I Cicing Gudig tuara karoan baana apa, saapan koné lantas guruné ngemplangin I Cicing Gudig. “Koang,” kéto koné aduhanné I Cicing Gudig.
Déning kéto, buin koné pasangetina ngemplangin I Cicing Gudig. “Koang,” kéto koné buin aduhanné. Buin kemplangina tur pasangetina, buin koné I Cicing Gudig makoangan. Brangti koné lantas gurunné, lantas ia nyemak penyalin anggona nigtig I Cicing Gudig, kanti éncéh-énceh, mara koné suudanga.
Kacrita nyanan petengné koné ka Pura Dalem lantas I Cicing Gudig mabakti, mapinunas apang buin dadi Cicing Gudig buka jati mula. I Cicing Gudig lantas buin dadi cicing gudig.